Aukin arðsemi humarveiða
Helstu niðurstöður rannsóknanna á árunum 2007-2008 sýndu að löskun humars við veiðar var breytileg milli báta og tengdist m.a. lengd trollsins. Veiðar með lengra trolli ullu meiri skaða sem kom fram í tap á klóm og brotinni skel.
Verkefnið var sett upp sem námsverkefni og var nemandi frá Skotlandi, Heather Philp, ráðin til verksins. Verkefninu var skipt í 5 hluta:
- athuganir á árstíðabundnum gæðum og ástandi humars,
- áhrif veiða og meðhöndlun á gæði og verðmæti humars,
- þróun aðferða til að aldursgreina humar,
- lífssaga humars og mat á nýliðun og útbreiðslu ungviðsstiga
- samanlögð áhrif allra þátta á arðsemi humarveiða.
Athuganir á mismunandi meðhöndlun humars virtust ekki benda til að meðhöndlun hefði áhrif á gæði hvað varðar tíðni skyrhumars. Tíðni skyrhumars var hinsvegar háð árstíma og var hann algengur í júní en að mestu horfinn í júlí.
Hvað varðar aðrar afurðir verkefnisins þá var þróuð aðferð til að aldursgreina humar út frá þéttleika litarefna í augnstilkum en hingað til hefur ekki verið hægt að aldursgreina humar. Auk þess var lokið við gerð straumalíkans sem nýtist t.d. til að meta áhrif strauma og annarra eðlisþátta sjávar á útbreiðslu og afkomu humarungviðis. Sjá má dæmi um keyrslur líkansins á www.marice.is/code
Sýrslu verkefnisstjóra má nálgast hér
Tilvísunarnúmer AVS: R 031-06
