Doktor í vinnsluspá þorskafla
Markmið verkefnisins var að safna gögnum um þorskveiðar og vinnslu fjögurra íslenskra sjávarútvegsfyrirtækja, greina þau á tölfræðilegan hátt og setja upp bestunarlíkön til að auðvelda stjórnun á veiðum og vinnslu þorsks á Íslandsmiðum.
Gögnum um flakanýtingu, los og hringorma í þorski var safnað frá 2002 til 2006. Allar þessar breytur hafa veruleg áhrif á hagnað af þorskveiðum og vinnslu.
Niðurstöður verkefnisins gefa til kynna að afrakstur virðiskeðju þorsks geti verið aukinn með því að sækja þorskinn á ákveðin veiðisvæði og á ákveðnum tíma árs en niðurstöðurnar sýndu að flakanýting, los og hringormar í þorski eru m.a. háð veiðistaðsetningu og árstíma.
AVS sjóðurinn hefur styrkt þessi verkefni sem Sveinn hefur verið að vinna að á undanförnum árum, en þessi verkefni eru “Spálíkan fyrir þorskvinnslu” (R 020-03) og “Verkunarspá - Tengsl hráefnisgæða við vinnslu- og verkunarnýtingu þorskafurða” (R 030-04).
Þessi tímamót Sveins eru gott dæmi um hvernig AVS sjóðurinn tekur þátt í að efla þekkingu innan sjávarútvegsins um leið og nýir og velmenntaðir sérfræðingar verða til í íslenskum sjávarútvegi.
Nánari upplýsingar um doktorsvörn Sveins er að finna hér.
