Er heilsan í lagi?
AVS styrkti verkefnið Rannsóknir á bráðasvari hjá þorski, þar sem verið var að rannsaka breytingar sem verða á samsetningu blóðvökva í þorski þegar hann verður fyrir streitu, áverkum eða sjúkdómum.
Þessar breytingar eru kallaðar bráðasvar og er mjög fljótvirkt ráð skepnunnar til að vinna bug á t.d. sýkingu, þetta er ólíkt því sem kallast ónæmis- eða mótefnasvar sem tekur nokkrar vikur að koma fram hjá fiskum.
Verkefnið var hluti mastersnáms Berglindar Gísladóttur, sem fólst í því að setja upp nýja tækni að Keldum til að greina bráðasvar í blóðvökva þorsks, en Berglind sótti námskeið við háskólann í Aberdeen til að læra þessa tækni sem kölluð er tvívíddar (2D) rafdráttartækni.
Bráðasvar í þorski var meðal annars framkallað með sýkingu og kom þá í ljós lækkað magn CRP (C-reactive prótein eða bráðaprótein) í blóðvökva, sem er ólíkt því sem gerist í mönnum. Einnig sást mikill munur milli einstaklinga sem bendir til þess að þessi aðferð sé ekki hentug greiningaraðferð. Vonast er þó til að hún nýtist til að greina breytingar á öðrum próteinum í blóðvökva þorsks sem gætu gefið vísbendingar um almennt heilsufarsástand þorsks.
 |
|
Verkefnahópurinn á Tilraunastöð HÍ í meinafræðum að Keldum F.v. Sigríður Guðmundsdóttir, Bergljót Magnadóttir og Berglind Gísladóttir |
Nánari upplýsingar um verkefnið má fá hjá verkefnisstjóra þess Bergljót Magnadóttur
