Fiskneysla ungs fólks minnkar
Viðamikil rannsókn meðal ungs fólks á aldrinum 17 til 26 ára bendir til að Íslendingar muni borða enn minna af fiski í framtíðinni en þeir gera í dag ef ekkert verður að gert. Ungt fólk borðar fisk sem aðalrétt að meðaltali 1,3 sinnum í viku sem er töluvert undir þeirri fiskneyslu sem Lýðheilsustöð ráðleggur. Fiskneysla þessa aldurshóps hefur dregist verulega saman á undanförnum árum.
Einar K. Guðfinnsson hélt blaðamannafund í Sjóminjasafninu í dag þar sem niðurstöður AVS verkefnisins Viðhorf og fiskneysla ungs fólks: Bætt ímynd sjávarafurða voru kynntar og þar kom meðal annars fram:
- Munur er á fiskneyslu eftir landshlutum
- Matarvenjur í æsku hafa mótandi áhrif á fiskneyslu ungs fólks
- Ungar konur eru hrifnar af fiski og grænmeti en ungir karlar eru hrifnari af skyndibita og kjöti
- Stefnir í enn meiri samdrátt í fiskneyslu á komandi árum
Rannsóknin er samvinnuverkefni Matís ohf., Félagsvísindastofnunar Háskóla Íslands, Rannsóknarstofu í næringarfræði á Landspítala Háskólasjúkrahúsi og fyrirtækisins Icelandic Services. Í verkefninu voru kannaðar neysluvenjur ungs fólks (17-26) ára á Íslandi. Könnunin tók meðal annars til viðhorfa til heilsu, fiskneyslu, neyslu annarra matvæla, innkaupa á fiski og einnig smekk á mismunandi fiskréttum. Spurt var um þætti sem hafa áhrif á fiskneyslu, kannað hvaðan neytendur fá upplýsingar um fisk og það traust sem þeir bera til slíkra upplýsinga.
Greining á afstöðu ungs fólks til matar og heilsu leiddi í ljós þrjá aðskilda neysluhópa. Minnsti hópurinn er 18% af heildinni og mótast neysla hans af heilsu og áhuga á eldamennsku. Þessi hópur neytir fisks. Í næsta hóp (39%) eru yfirleitt karlmenn sem borða þann mat sem settur eru fyrir þá en kjósa helst kjöt og skyndibita. Stærsti hópurinn (43%) eru mestan part konur sem njóta þess að borða fisk en eru óöruggar um hvernig skal matreiða hann.
Fjölskyldan er sterkur áhrifavaldur á fiskneyslu en í ljós kom að matarvenjur í æsku hafa mótandi áhrif á fiskneyslu unga fólksins og einnig búseta þeirra í æsku. Einnig kom fram að sá hluti fólks sem er fluttur úr foreldrahúsum borðar minnst af fiski. Þá virðist munur á fiskneyslu eftir landshlutum en fólk á landsbyggðinni hefur ekki jafn greiðan aðgang að fiskbúðum eða ferskfiskborði í matvörubúðunum og fólk á höfuðborgarsvæðinu.
Fólk á landsbyggðinni hefur þar af leiðandi ekki úr jafn mörgum fiskréttum að velja í verslunum og borðar frekar hefðbundnar fisktegundir og -rétti. Úrtak rannsóknarinnar var 1.735 manns og svarhlutfall 86,7%. Rannsóknaverkefnið er styrkt af AVS rannsóknarsjóði í sjávarútvegi.
Tilvísunarnúmer AVS: R 020-05
Sjá nánari frétt á mbl.is: http://mbl.is/mm/frettir/frett.html?nid=1259783
Nánari upplýsingar veitir:
Emilía Marteinsdóttir hjá Matís í síma 858 5032
Nánari upplýsingar um verkefnið á heimasíðu AVS
