Hvaða kæliaðferð er best?
Menn eru ekki alltaf á eitt sáttir um leiðir í vinnslu sjávarafurða og því er mikilvægt að mismunandi vinnsluaðferðir séu rannsakaðar á skipulegan máta svo hámarka megi verðmæti íslensks sjávarfangs. Álit framleiðenda á áhrifum ólíkra kæliaðferða eftir veiði á gæði og nýtingu saltfiskafurða hefur verið nokkuð mismunandi. Er þá fyrst og fremst átt við ísunaraðferðir, flöguís / vökva- eða krapaís.
Einnig hefur verið nokkur umræða um kælingu þar sem ís eða vökvaís er blandað í blóðgunarvatn eða í sjó til skolunar á fiski eftir aðgerð. Notkun vökva- og krapaíss hefur í för með sér ótvíræða hagræðingu í vinnu við ísun en ekki hefur ríkt sátt um áhrif kælingar og geymslu á verkunareiginleika fisksins.
AVS sjóðurinn styrkir verkefnið "Ferlastýring við veiði, vinnslu og verkun saltfisks", í því verkefni á að rannsaka þessa þætti. Í tilraunum verkefnisins verða sannreyndar tilgátur um að of hröð kæling geti haft neikvæð áhrif á litablæ afurða og að notkun vökva- eða krapaíss geti aukið los í saltfiskflökum. Fylgst verður með breytingum á hitastigi og þyngd fiska fram að vinnslu og nýtingu og gæðum við vinnslu og verkun. Samanburður verður einnig gerður á verkun flaka og flatts fisks til að kanna hvort munur sé á losi í saltfiskafurðum eftir mismunandi vinnsluleiðum.
Þar sem aflanum er fylgt eftir alveg frá veiðum gefst líka tækifæri til að taka út vinnsludekk og koma fram með tillögur að almennum úrbótum við meðhöndlun afla um borð, s.s. að draga úr falli fiska niður í lest sem getur valdið auknu losi og gæðarýrnun og þar með rýrnun á verðmæti aflans. Mun sú viðbótarþekking nýtt í öðru verkefni "Vinnsluferill um borð í línuveiðiskipum" sem einnig er styrkt af AVS-sjóðnum.
