Aðferð til að meta næringarástand þorsklirfa
Þekkingin sem aflað var í verkefninu verður lögð til grundvallar við mat á næringarástandi þorsklirfa í eldi og aðgerðum er miða að bættri meltingargetu þeirra. Þannig nýtist trypsín sem nokkurs konar lífmerki við mat á næringarástandi þorkslirfa. Verkefnið, sem er hluti af doktorsverkefni við Háskóla Íslands var unnið í samstarfi Raunvísindastofnunar Háskóla Íslands og Hafrannsóknastofnunarinnar. Handrit um niðurstöður rannsóknanna var nýlega sent til birtingar í alþjóðlega vísindaritið Aquaculture. Rannsóknaverkefnið hefur einnig verið kynnt með fyrirlestrum og veggspjöldum á innlendum og erlendum vettvangi.
Niðurstöður verkefnisins leiddu í ljós að virkni trypsíns sem og meltingarensímsins chymotrypsíns er breytileg eftir aldri þorsklirfa. Þær benda jafnframt til þess að nota megi trypsínvirkni í heilum lirfum sem lífmerki fyrir svelti eða lélegt næringarástand fyrstu 3 - 4 vikurnar eftir klak. Trypsínvirkni reyndist mjög lág á frumfóðrunar stigi þorsklirfa, sem líklega hefur áhrif á getu þeirra til að melta prótein. Því var ákveðið að reyna að örva trypsínvirknina á þessu stigi með viðbót próteinmeltu og auka þannig meltingargetu þeirra.
Eldishlutanum, sem framkvæmdur var í Tilraunaeldisstöð Hafrannsóknastofnunarinnar að Stað í Grindavík, er lokið og kom í ljós að meðhöndlun þorsklirfa með próteinmeltu eykur lifun þeirra samanborið við viðmiðunarhóp. Næstu skref felast í því að greina áhrif próteinmeltunnar á tjáningu trypsína og annarra próteina í lirfunum með hjálp próteinmengjagreininga. Þannig fást upplýsingar um ný lífmerki sem líklega má nota til að meta næringarástand þorsklirfa í eldi sem og viðbrögð þeirra við mismunandi fóðri.
Fyrsti hluti þessa verkefnis var nýlega kynntur með veggspjaldi á Raunvísindaþingi 2006.
AVS hefur einnig fengið skýrslu verkefnisstjóra.
